ನಿರೀಕ್ಷೆ…

ಮಂದಹಾಸ ಮೊಗದಲ್ಲಿ

ಹೊಂಗನಸು ಕಂಗಳಲ್ಲಿ

ಕಿರುನಗೆಯ ಬೀರುತ 

ನಿನ್ನಾಗಮನಕ್ಕಾಗಿ ಕಾದಿರುವೆ ನಲ್ಲಾ

ಇನ್ನಾದರೂ ನೀ ಬಾರೆಯಾ??

ನಿನ್ನ ನಿರೀಕ್ಷೆಯಲ್ಲೇ ನಾ ಕಳೆದ

ಆ ಸಮಯದ ಲೆಕ್ಕ ಕೊಡಲು

ನನ್ನ ರಮಿಸಿ ಮತ್ತೆ ನಗಿಸಲು ನಲ್ಲಾ

ಇನ್ನಾದರೂ ನೀ ಬಾರೆಯಾ?? 

ಚಂದಾ / ಸವಿತಾ ಇನಾಮದಾರ್.

 

ಮಣ್ಣಿನ ಘಮಲು..ಪ್ರೀತಿಯ ಹೊನಲು..

 ಹಳ್ಳಿಯಿಂದ  ದಿಲ್ಲಿಗೆ  ಬಂದರೂ
ತಾಯ ಮಡಿಲನು ಹ್ಯಾಗೆ ಮರೆಯಲಿ ??
ಅಲ್ಲಿನ ಮಣ್ಣಿನ ಮಧುರ ಘಮಲಿಗೆ
ಇಲ್ಲಿನ ಮಾಲಿನ್ಯವ  ಹ್ಯಾಗೆ  ಹೋಲಿಸಲಿ??

ಹಚ್ಚ ಹಸಿರು ಎಲೆಗಳಲಿ ಕಂಡೆ ನನ್ನ ಬಾಲ್ಯವ

ಹಣದ ಹೊಳೆ ಹರಿಸಿದರೂ ಕಟ್ಟೆನದರ ಮೌಲ್ಯವ

ಕೈ ಬೀಸಿ ಕರೆಯುತಿಹವು ಹಣ್ಣು – ಹೂವು, ಕಾಯಿ

ಕಾಯುತ್ತಾ ನಿಂತಿಹಳು ನನ್ನ ಪ್ರೇಮಮಯಿ ತಾಯಿ.

ಅವಸರದಿ ಅಪ್ಪಾಜಿ ಓಡೋಡಿ ಬರುವರು

ಮಗಳ ಮೊಗವ ನೋಡಿದೆಡೆ ಬರಸೆಳೆದು ಅಪ್ಪುವರು.

ತಂದೆ- ತಾಯಂದಿರ ಈ ಸುಮಧುರ ಬಾಧವ್ಯ

ಕೊನೆಯವರೆಗೆ ಇರುವುದು ಚಿರ ನೂತನ – ಚಿರ ನವ್ಯ.

ಚಂದಾ / ಸವಿತಾ ಇನಾಮದಾರ್.

ಗಂಡನ ಗೋಳ್ಯಾಟ…

ಏ  ನನ್ನ ಪ್ರೀತಿಯ ಪಮ್ಮಿ…  

 ನನ್ನ  ಮಕ್ಕಳ ಮೆಚ್ಚಿನ  

ಗುಂಡು ಗುಂಡಗಿನ ಮಮ್ಮೀ..

ಇನ್ನಾರ ಮಾಡ ಸ್ವಲ್ಪ ನೀ

ತಿನಸೂದು - ತಿನ್ನೂದು ಕಮ್ಮಿ..

ಇಲ್ಲss ..ನೀ ಯಾರಿಗೂ ಇಲ್ಲಾ ಕಮ್ಮಿ,

ಆದ್ರ ನಿನ್ನss  ನೋಡಿ ನಾಚಲಿಕ್ಕೆ ಹತ್ತ್ಯಾವಲ್ಲ

ನಮ್ಮ ಧಾರವಾಡದ ಎಮ್ಮಿ..

ಏ ಪಮ್ಮೀ…ನಿಂದ್ರ..ನಿಂದ್ರು..

ಸ್ವಲ್ಪ ನನ್ನ ಮಾತು  ಕೇಳಿಲ್ಲೆ..

ಛೇ..ಛೇ.. ಬ್ಯಾಡ … ಬ್ಯಾಡಾ ರಾಣೀ..

ನಾ ಹೀಂಗಂತೀನಿ ಅಂತ

ಮಾರೀ ಸೊಟ್ಟ ಮಾಡ ಬ್ಯಾಡಾ

ಮತ್ತ ಜಿಮ್ಮಿಗೂ  ನೀ ಸೇರಕೋ ಬ್ಯಾಡಾ

ಅಲ್ಲಿಗೆ ಹೋಗಿ  ಎಷ್ಟ ಒದ್ದಾಡಿದ್ರೂನೂ ,

ಬೇಕಾದಷ್ಟು ರೊಕ್ಕಾ ಸುರುದ್ರೂನೂ ,

ನೀ ಆಗಂಗೇ ಇಲ್ಲಾ ಬಿಡು ‘ ಕಮ್ಮಿ.. ‘

ಆದ್ರೂ ಆದ್ರೂ..  ನೀನssss..  ನನ್ನ..

 ಪ್ರೀತಿಯ ಡುಮ್ಮ ಡುಮ್ಮಗಿನ .. ಪಮ್ಮಿ..

ನನ್ನ ಮುದ್ದಿನ ಮಕ್ಕಳ  ಪ್ರೀತಿಯ ಮಮ್ಮೀ…

ಚಂದಾ / ಸವಿತಾ ಇನಾಮದಾರ್.