ಪ್ರೀತಿಸೋದೇ ತಪ್ಪಾ ?

ನಲ್ಲಾ..

ಎನ್ನ ಅಂತರಂಗವನು ಅರಿತಿರುವ ನೀನು

ಇಂದೇಕೆ ಮೌನವಾಗಿ ಕುಳಿತಿರುವೆ?

ನಿನ್ನ ಕೋಪವನು ಎದುರಿಸಬಲ್ಲೆ

ಆದರೆ ನಿನ್ನ ಅಲಕ್ಷತೆ ನಾ ತಾಳಲಾರೆ.

ನಿನ್ನ ಪ್ರೀತಿಯಲ್ಲಿ ಮಿಂದವಳಿಗೆ

ಅನುರಾಗದ ಅರಮನೆಯಿತ್ತೆ

ಇಂದು ಒಬ್ಬಂಟಿಯನ್ನಾಗಿಸಿ

ಬಿಸಿಲ ಧಗೆಯಲ್ಲಿ ನಿಲ್ಲಿಸಿದೆ.

ನನ್ನ ತಪ್ಪಾದರೇನು ಹೇಳು  ?

ನಿನ್ನ ಪ್ರೀತಿಸೋದೇ ತಪ್ಪಾ ?

ಹಾಗಿದ್ದರೆ ನೀ ಕೊಡುವ ಪ್ರತಿ ಶಿಕ್ಷೆಯನು

ಒಲುಮೆಯಿಂದ ಒಪ್ಪುವೆ.

ನನ್ನ ಬಿಟ್ಟು ನೀ ಇರಲಾರೆಯಂಬ

ಒಂದೇ ಆಸೆಯಿಂದ ಮತ್ತೆ ಕಾಯುವೆ. 

ಚಂದಾ / ಸವಿತಾ ಇನಾಮದಾರ್.

ಶಿವ-ಶಿವೆ

ಸತಿಯ ಪ್ರೇಮಕೆ ಮನಸೋತ ಶಿವನು

ಪತಿಯ ಪಟ್ಟವನೇರಿದ,

ಅರ್ಧಾಂಗಿಯ ಅಭಿಲಾಷೆಗಾಗಿ

ಶಂಕರ ಅರ್ಧನಾರೀಶ್ವರನಾದ.

ಪ್ರೀತಿಸಿ, ಮೋಹಿಸಿದ ಜೋಗೇಶ್ವರ

ಕೈಹಿಡಿದವಳ ಜೋಳಿಗೆಯನು

ಅಮೂಲ್ಯ ಪ್ರೀತಿಯಿಂದ ತುಂಬಿದ

ಶಿವರಾತ್ರಿಯ ಮಹಿಮೆ ಹೆಚ್ಚಿತು

ಶಿವ – ಶಿವೆಯರ ಪುನರ್ ಮಿಲನದಿಂದ. 

ಚಂದಾ / ಸವಿತಾ ಇನಾಮದಾರ್.

ಜಾಗೇಶ್ವರ - ಪರಮೇಶ್ವರ

ಜಾಗೇಶ್ವರದ ಬೆಟ್ಟಗಳ

ಕಣಕಣದಲಿ, ಕ್ಷಣ ಕ್ಷಣದಲಿ

ಶಿವ - ಸತಿಯ ವಿಯೋಗದಲ್ಲಿ

ಅಲೆಯುತ್ತಿರುವುದನು ಕಂಡೆ.

ಒಮ್ಮೆ ಲಿಂಗ ರೂಪದಲ್ಲಿ

ಮತ್ತೊಮ್ಮೆ ನಟರಾಜನ ರೂಪದಲ್ಲಿ

ಮಗದೊಮ್ಮೆ ಅರ್ಧನಾರೀಶ್ವರನ ರೂಪದಲ್ಲಿ.

ಆಹಾ..ಏನೆಂದು ಬಣ್ಣಿಸಲಿ ಆ ಲಿಂಗ ಭೈರವನ

ಅದ್ಭುತ ತಾಂಡವ ರೂಪ.

ಗಿಡಮರಗಳೂ ಅವನೊಂದಿಗೆ ನರ್ತಿಸುವುದ ಕಂಡು

ದೂರವಾಗುವುದು ಮನದ ತಾಪ. 

ಸವಿತಾ ಇನಾಮದಾರ್

ಪ್ರೇಮ ಸಂದೇಶ-

ನಲ್ಲನ ಪ್ರೇಮ ಸಂದೇಶವ ಕೇಳಿ
ನಲ್ಲೆಯ ಕಪೋಲ ಕೆಂಪಾಯಿತು
ಸೂರ್ಯನ ಕಣ್ಸನ್ನೆಯ ಕಂಡು

 ಚಲಿಸುವ ಮೋಡವೂ ಕೆಂಪಾಯಿತು..

ಪ್ರಿಯತಮನ ಪಿಸು ಮಾತಿನಲ್ಲಿ

ಸವಿ ಜೇನು ತುಂಬಿತ್ತು

ಬೇಗ ಸೇರುವಾ ಎಂಬ

ಸಂಕೇತ ಸಾರುತ್ತಿತ್ತು.

ಇನಿಯನ ಬಾಹು ಬಲದ ಬಿಗಿತದಲ್ಲಿ

ಅಮಿತವಾದ ಸುಖ

ಆ ಕ್ಷಣ ಬೇಗ ಬರಲೆಂದು

ಕಾಯುತ್ತಿರುವೆ ಎನ್ನ ಪ್ರಾಣ ಸಖಾ.  

ಚಂದಾ / ಸವಿತಾ ಇನಾಮದಾರ್.