ಯುಗಾದಿ

ದುರ್ಮುಖಿನಾಮ ಸಂವತ್ಸರವಿದ್ದರೂ ನಲ್ಲಾ..

ಸುಮುಖಿಯಾಗಿಸಿ ಬಾ ಸವಿಯೋಣ ಬೇವು ಬೆಲ್ಲ.

ಈ ಬೆಲ್ಲದ ಸಿಹಿ ಮರೆಸುವುದು

ಜೀವನದಲ್ಲಿ ಬರುವ ಬೇವಿನಂತಹ ಕಹಿಯನ್ನು.

ಎರಡರ ಸಮರಸದಿಂದ

ಸಾಗಿಸೋಣ  ನಮ್ಮ ಬಾಳ ನೌಕೆಯನ್ನು.

ಒಲವಿನ ಮಾತಿನಿಂದ

ಮರೆಸುಯುವೆ ನಿನ್ನೆ ಸಿಡುಕಿದ್ದನ್ನು

ನನ್ನ ಚಿನ್ನಾ ಎಂಬ ಮೃದು ಕರೆಯಲ್ಲಿ

ಮರೆಸುಯುವೆ ನನ್ನಿರುವನ್ನು.

ಯುಗ-ಯುಗಗಳೇ ಕಳೆದರೂ

ಅಳಿಯದೆಮ್ಮ ಪ್ರೀತಿಯ ಬೆಸುಗೆ

ನೀ ನನ್ನವನಾಗಿರುವುದೇ

ಎನಗೆ ಪ್ರತಿ ಯುಗಾದಿಯ  ಕೊಡುಗೆ !!

ಚಂದಾ / ಸವಿತಾ ಇನಾಮದಾರ್

ಚಂದಾ / ಸವಿತಾ ಇನಮದಾರ್.

ರಂಗಿನೋಕುಳಿ

ನಮ್ಮ ಪ್ರಥಮ ಮಿಲನದ ಆ ಮಧುರ ಕ್ಷಣಗಳು 

ಮತ್ತೆ ಮತ್ತೆ ನೆನಪಾಗುತಿವೆಯಲ್ಲಾ ನಲ್ಲಾ..

ಆಹಾ..ಅದೆಂಥಾ ಅಪೂರ್ವ ಪಯಣ !!

ನಿನ್ನ ಬಲಿಷ್ಠ ಭುಜದ ಮೇಲೆ

ನಾ ಮೈಮರೆತು ಮಲಗಿದ್ದೆ

ನನ್ನನ್ನು ಎಬ್ಬಿಸದೇ ನೀ ನಿದ್ದೆಗೆಟ್ಟಿದ್ದೆ.

ನನ್ನ ಮುಂಗುರುಳ ಚೆಲ್ಲಾಟ

ನಿನ್ನ ಆ ನೇರ ನೋಟ,

ಇನ್ನೂ ಎನ್ನ ಮೈ ನವಿರೇಳುತಿದೆ.

ಥಟ್ಟನೇ ಕಂಗಳು ಒಂದಾದಾಗ

ಎಲ್ಲೆಡೆಗೂ ರಂಗಿನೋಕುಳಿ ಚಿಮ್ಮಿತ್ತು

ನಾಚಿ ನೀರಾಗಿ ಮಾತೇ ಬಾರದಾಗಿತ್ತು.

ನಮ್ಮೀರ್ವರ ಮಧುರ ಮಿಲನಕೆ

ಆ ಪರಶಿವನ ಅನುಗ್ರಹವಿತ್ತು.

ಅಪರಿಚಿತನ ಪರಿಚಯವಾಗಲು 

ಪುನರ್ಜನ್ಮದ ಬಂಧನವೇ ಕಾರಣವಾಗಿತ್ತು. 

ಜೀವನದಲ್ಲಿ ರಂಗು ತುಂಬಿದವನ

ಹೃದಯದಲ್ಲಿ ಎನಗೆ ಸ್ಥಾನ ಮಾನ ಸಿಕ್ಕಿತ್ತು.

. ಚಂದಾ/ ಸವಿತಾ ಇನಾಮದಾರ್.

ಹುಲ್ಲ ಹಾಸಿಗೆ....

ಇನಿಯನ ಆಗಮನಕ್ಕಾಗಿ ಕಾಯುತ್ತಿಹಳೀ ಭಾಮಿನಿ
ಜನುಮ ಜನುಮಕ್ಕೂ ಬೇಕೆನಗೆ ಸ್ವಾಮಿ ನೀ

ನೀ ಜೊತೆಯಿದ್ದರೆ ಬೇಡೆನಗೆ ಆ ಅರಮನೆಯ ಸುಪ್ಪತ್ತಿಗೆ
ಸಾಕೆನಗೆ ರಾಗಿಯ ಮುದ್ದೆ ಒಪ್ಪೊತ್ತಿಗೆ.

ಬಾ ಬೇಗ ನಲ್ಲಾ ರಾತ್ರಿಯಾಗುತ್ತಿದೆ

ಬರುವುದೆಮಗೆ ಈ ಹುಲ್ಲ ಹಾಸಿಗೆಯಲ್ಲೂ ಗಾಢ ನಿದ್ದೆ.

ಚಂದಾ / ಸವಿತಾ ಇನಾಮದಾರ 

ಕೆಂಪಾಯಿತು ಬಾನು

ಕೆಂಪಾಯಿತು ಬಾನು

ನಲ್ಲಾ..

ನಿನ್ನ ಆಲಿಂಗನದ ಸ್ವರ್ಗ ಸುಖದಲ್ಲಿದ್ದವಳಿಗೆ

ಬೆಳಗಾದದ್ದೇ ತಿಳಿಯಲಿಲ್ಲ..

ಮತ್ತೆ ವಿರಹದ ನೋವ ಕೊಟ್ಟು

ಎನ್ನನಗಲಿ ನೀ ಹೋಗೇ ಬಿಟ್ಟೆಯಲ್ಲ?

ಒಬ್ಬಂಟಿಯಾದಾಗ ಏನೂ ರುಚಿಸದೆನಗೆ

ನನ್ನ ನೋವು ಕಾಣದೇ ನಿನಗೆ?.

ನೀನಿರದೆ ಸಿಹಿಯೂ ಕಹಿಯಾಗುವುದು

ಹಸಿವೆಯೂ ಮಾಯವಾಗುವುದು.

ಕಾತರದಿ ನಿನ್ನಾಗಮನಕೆ

ಕಾಯುತಿವೆ ಎನ್ನ ಕಂಗಳು

‘ಚಿನ್ನಾ’ ಎಂಬ ಸವಿ ನುಡಿ ಕೇಳಲು

ಕಾಯುತಿವೆ ಎನ್ನ ಕಿವಿಗಳು.

ನನ್ನ ಪ್ರೀತಿಯ ಆಳ ಅರಿತ

ಆ ಬಾನೂ ಸಹ ಕೆಂಪಗಾಪಾಯಿತು

ಮುತ್ತಿನ ಮಳೆಗೆ ಕಾಯುತ್ತಿದ್ದ

ಇಳೆಯೂ ತಂಪಾಯಿತು.

ಮುಸ್ಸಂಜೆಯಾಯಿತು ಬಂದೆನ್ನ ಸೇರು ನಲ್ಲ

ಇನ್ನುಈ ವಿರಹದ ಬೇಗೆಯನ್ನು ನಾ ತಾಳೆನಲ್ಲಾ.

ಸವಿತಾ ಇನಾಮದಾರ್.

ಇನ್ನು ದೂರವಿಲ್ಲ..

ಇನ್ನು ದೂರವಿಲ್ಲ..

ಓ ನನ್ನ ಪ್ರೀತಿಯ ನಲ್ಲಾ

ಇಂದೇಕೋ  ಎನಗೆ ಕೆಲಸದಲ್ಲಿ ಮನಸೇ ಇಲ್ಲ

ನಿನ್ನ ನೆನಪು ಬಲು ಕಾಡುತಿದೆ

ಓಡೋಡಿ ನಿನ್ನ ಸೇರಬೇಕೆನಿಸುತಿದೆ

ಬರಲೇ ನಾ ಅಲ್ಲಿ ಹಾರಿ..

ದೂರವಿಲ್ಲ ಇನ್ನು ನಮ್ಮ  ದಾರಿ.

ಅಪರಂಜಿಯಂಥಾ ನಮ್ಮ ಪ್ರೀತಿಯ ಕಂಡು

ಆ ಮಹಾದೇವನೇ ಒಲಿದಿರುವನು

ಪ್ರತಿ ಕ್ಷಣವೂ ನಿನ್ನನ್ನೇ ನೆನೆಯುವಂತೆ ಮಾಡಿಹನು.

ನಮ್ಮ ಪ್ರೇಮದಲ್ಲಿ ಅಡಗಿದೆ ಭರವಸೆಯ ಶಕ್ತಿ

ಕಳೆದು ಹೋದ ಪ್ರೀತಿ ಮರಳಿ ಪಡೆದಾಗ

ಹೆಚ್ಚುವುದು ಆ ಪರಶಿವನಲ್ಲಿ ಭಕ್ತಿ.

ಸವಿತಾ ಇನಾಮದಾರ್. 

ಹೆಸರಿನಲ್ಲೇನಿದೆ ?

ಹೆಸರಿನಲ್ಲೇನಿದೆ ?

ಎಲ್ಲವೂ ಹೆಸರಿನಲ್ಲೇ  ಸಿಲುಕಿದೆ

 ಹೆಸರಿನ ಪ್ರತಿ ಅಕ್ಷರದಲ್ಲೂ ಹೊಸತನ ಅಡಗಿದೆ.

ಎನ್ನಮ್ಮನಿಟ್ಟ ಪ್ರೀತಿಯ ಹೆಸರನು ಅತ್ಯಮ್ಮ ಬದಲಾಯಿಸಿದಳು

ಹಿರಿಯರ ಇಷ್ಟವನರಿತು ಸುಮ್ಮನೇ ಹೂಂಗುಟ್ಟು ಎಂದಿದ್ದಳು.

ಬದಲಾಯಿಸುವುದಕ್ಕೂ ಮುನ್ನ ಕೇಳಿದ್ದರೆನ್ನ

ಬದಲಾಯಿಸಲೇ ನಿನ್ನ ಪ್ರೀತಿಯ ಹೆಸರನ್ನ?

ಎನ್ನೊಪ್ಪಿಗೆ ಸಿಕ್ಕ ಮೇಲೆ ಬದಲಾಗಿತ್ತು ಕುರುಹು..

ಅಡಗಿತ್ತು ನಾ ಹುಟ್ಟಿದಾಗ ಹಾರಿಸಿದ್ದ ತುಪಾಕಿಗಳ ಸ್ವರವು.

ಎರಡು ದಶಕಗಳಾದರೂ ಅನಿಸದಿದು ಎನ್ನದೇ ಹೆಸರೆಂದು

ಆ ಹೆಸರಿನಲ್ಲೇ ಎನ್ನುಸಿರು ಸಿಲುಕಿದೆ ಇಂದು.

ಆದರೂ ಎನ್ನ ಅಸ್ಥಿತ್ವವನು ಮರೆಯಲು 

ಬಿಟ್ಟಿಲ್ಲ ನನ್ನ ಪ್ರೀತಿಯ ನಲ್ಲ .

ಅದೇ ಚಂದದ ಹೆಸರನ್ನುಮಧುರವಾಗಿ 

ಸದಾ ಹೃದಯಾಳದಿಂದ ಕರೆಯುವನಲ್ಲ.

ಚಂದಾ / ಸವಿತಾ ಇನಾಮದಾರ್.  

ಮಾಂಗಲ್ಯ ಭಾಗ್ಯ.

ನಲ್ಲಾ..

ಕಾರ್ತಿಕ ಮಾಸದಲಿ ಹುಣ್ಣಿಮೆಯ ದೀಪದೊಡನೆ

ನಿನ್ನ ಪ್ರೀತಿಯ ಹೊಳಪು ಎನ್ನ ಕಣ್ಣುಗಳಲಿ ಬೆಳಗಿದೆ..

ಮುತ್ತುಗಳ ಸುರಿಮಳೆಯಲ್ಲಿ ವಿರಹದಿ ಬಾಡಿದ ಮೊಗವು

ರಾಗ ರಂಜಿತವಾಗಿ ಮತ್ತೆ ಮುತ್ತು ಬೇಕೆನುತಿದೆ.

ಜನುಮಜನುಮದ ನಮ್ಮೀ ಮಧುರ ಬಂಧನವು

ಮಾಂಗಲ್ಯದ ಭಾಗ್ಯದಿಂದ ಮತ್ತೆ ಪವಿತ್ರವಾಗಿದೆ.

ಪ್ರತಿಕ್ಷಣವೂ ನಿನ್ನುಸಿರ ಹಸಿರೆನ್ನ ಪಾಲಿಗೆ ನೀಡೆಂದು
  ಆ ಮಮತಾಮಯಿ ಮಾತೆಗೆ ನಾ ಬೇಡುತ್ತಿರುವೆ. 

ಸವಿತಾ ಇಮಾದಾರ್…