ಒಲವಾಮೃತ

ಒಲವಾಮೃತ

ಮೊದಲ ನೋಟದಲ್ಲೇ
ನನಗರಿವಿಲ್ಲದೇ ಪ್ರೀತಿಯ ಬೀಜಾಂಕುರವಾಗಿತ್ತು
ಇದು ಅರ್ಥವಾಗೋಕೂ ಮುನ್ನ
ನೀ ಕಾಣದೇ ಮಾಯವಾದಾಗ
ತಲೆ ಕೆಟ್ಟು ಹೋಗಿತ್ತು.

ನಿನಗಾಗಿ ಕಾದೆ,
ಸಪ್ತಸಾಗರವ ದಾಟಿದೆ
ನನ್ನ ಮೇಲೆ ನಿನಗೆ ಪ್ರೀತಿಯಿಲ್ಲ
ಎಂದು ತಿಳಿದು ನಾ ಸುಮ್ಮನಾದೆ.

ಕ್ಷಣಗಳು ದಿನಗಳಾದವು
ದಿನ ವರುಷಗಳಾದವು
ಅಂತೂ ನೀ ಇಂದು ಮುಂದೆ ಬಂದು ನಿಂತಾಗ
ಏನೂ ತೋಚದೇ ನಿನ್ನ ನೋಡುತ್ತಲೇ ನಿಂತೆ.

ಆಗ 

ನಿನ್ನ ಹೊಳೆವ ಕಂಗಳಲ್ಲಿ ನನ್ನ ಬಿಂಬವ ಕಂಡೆ
ನನ್ನ ಪ್ರೀತಿಯ ಬಳ್ಳಿ ನಲುಗದೇ
ನಿನ್ನಾವರಿಸಿ ಹಬ್ಬಿರುವುದನು ನೋಡಿದೆ.

ನಿನ್ನ ಭಾವನೆಯ ಕುಸುಮ ನಸು ನಗುತ್ತಾ
ಸುಂದರ ಮುಖದಲ್ಲಿ ಅರಳಿದಾಗ
ಮೌನದಲೇ ಮನಸುಗಳು ಒಂದಾದವು.
ಒಲವಾಮೃತದ ಸವಿ ಉಣಬಡಿಸಿದವು.

ಸವಿತಾ ಇನಾಮದಾರ್. 

ರಾಧಾಶ್ಯಾಮ..

                     

ವರುಣನ ಚುಂಬನ.

ಅಹಾ..ಅಹಾ... 
ವರುಣನ ಆಗಮನದಿಂದ 
ಇಳೆಯ ಬಾಡಿದ ಮೊಗವರಳಿತು
ಮಣ್ಣಿನ ಘಮಲಿನಲ್ಲಿ ಮಿಂದು 
ಎನ್ನ ಹೃದಯ ಹಾಡಿತು..
ಇಂದೇ ಪ್ರಥಮ ಸಿಂಚನ.. ಅಹಾ..
ಭುವಿಗೆ ವರುಣನ ಚುಂಬನ..

ಚಂದಾ / ಸವಿತಾ ಇನಾಮದಾರ್.

ಇನಿಯಾ.. ಏಕೆ ಹೀಗೆ ಕಾಡುವೆ ?

ಹ್ಯಾಗೆ ಹೇಳಲಿ ನಿನಗೆ? ನಾ ಏನೆಂದು ತಿಳಿಸಲಿ?

ಮನಸಿನಲಿ ನುಸುಳಿರುವೆ, ಮುಂಗುರುಳ ತೀಡುತಿರುವೆ

ಮಿಂಚಿನಂತೆ ಕಂಡು ಕಾಣದಂತೆ ಮಾಯವಾಗುವೆ

ಇನಿಯಾ ಏಕೆ  ಹೀಗೆ ಕಾಡುವೆ ? ಎನ್ನನ್ನೇಕೆ  ನೀ ಕಾಡುವೆ??

ವಸಂತ ಋತುವಿನಲ್ಲಿ ಹೊಸ ಚಿಗುರಿನಂತೆ

ಎನ್ನ ಮನಸು ನೋಡು ಮತ್ತೆ ಚಿಗುರುತಿದೆ

ತಂಗಾಳಿ ಬೀಸುತ್ತ ನಿನ್ನ ಪಿಸುಮಾತು ಸಾರುತಿದೆ

ಹಳೆಯ ನೆನಪುಗಳ ಸುರುಳಿ ಉರುಳುತ್ತ ಬರುತಿದೆ

ಮೈಮನದಲಿ ನವರಾಗ ಉಕ್ಕಿಹರಿಯುತಿದೆ

ನಿನ್ನ ಒಂದು ನೋಟಕ್ಕೆ , ಆ ಮಧುರ ಸ್ಪರ್ಷಕ್ಕೆ

ಅನುದಿನವೂ ನಿನ್ನ ಸಾಮೀಪ್ಯವನ್ನು  ಬಯಸುತಿರುವೆ

ಕಾಯುತ್ತ ಕುಳಿತಿರುವೆ ಇನಿಯಾ ನೀ ಬೇಗ ಬಾರೆಯಾ??

ಚಂದಿರ ಹೇಳುತಿಹನು ಸುಂದರ ಜೋಗುಳ

ಕಂಗಳಲ್ಲಿ ಮಿನುಗುತಿದೆ ಹೊಳಪು ನಕ್ಷತ್ರಗಳ

ನಮ್ಮ ಕನಸು ನನಸಾಗಲೆಂದು ಮಧುರ ಮಿಲನವಾಗಲೆಂದು

ಬೇಡಿಕೊಳ್ಳೋಣ ಬಾ ಇನಿಯಾ ಆ ದೇವರಲ್ಲಿ

ಮತ್ತೊಮ್ಮೆ ತರುವನು ಸಂತೋಷ ನಮ್ಮ ಬಾಳಿನಲ್ಲಿ.

ಚಂದಾ / ಸವಿತಾ ಇನಾಮದಾರ್. 

ಹೂವು..ನೋವು..

ಕಲ್ಲಿನಲ್ಲೂ ಅರಳುವುದು ಹೂವು..
ಮುಳ್ಳಿನಲ್ಲೂ ಅರಳುವುದು ಹೂವು..
ಮನುಜನ ಮನದಲ್ಲಿ ಅರಳಿದಾಗ ಹೂವು
ದೂರವಾಗುವುದು ಎಲ್ಲಾ ನೋವು....

ಚಂದಾ / ಸವಿತಾ ಇನಾಮದಾರ್.

ತಾಯೇ ! ಏನು ಬೇಡಲಿ ಇನ್ನು?

ನಿನ್ನ ಕಾಣಲು ತಾಯೇ 

ಕನಸುಗಳ ನಾಕಂಡೆ

ನೀ ಮನಸು ಮಾಡಿದೊಡೆ

ನಾ ನೋಡಿ ಬಂದೆ, ನಿನ್ನ ಬಳಿ ಬಂದ.

ಕಂಡಿದ್ದೆ ನಾನಿನ್ನ ದಿವ್ಯ ರೂಪ

ಹಚ್ಚಿದ್ದೆ ಅಲ್ಲೊಂದು ಭಕುತಿಯಾ ದೀಪಾ.

ತಾಯೇ ನಮ್ಮೆಡೆಗೂ ಸದಾ ಪ್ರೇಮದಿಂದಲಿ ನೋಡು.

ಮಾತೆ ದರುಷನ ಭಾಗ್ಯ ಎಲ್ಲರಿಗೂ ನೀ ನೀಡು.

ಎಲ್ಲವನೂ ಕೊಟ್ಟಿರುವೆ ಏನು ಬೇಡಲಿ ಇನ್ನು??

ಜಗವನ್ನೇ ಬಿಟ್ಟಿರುವೆ ಏಕೆ ಕಾಡಲಿ ನಾನು?? 

ಚಂದಾ / ಸವಿತಾ ಇನಾಮದಾರ್.

ಆರ್ಭಟ

 ಗುಡುಗು ಸಿಡಿಲಿನ ಆರ್ಭಟದೊಡನೆ

ಚರಂಡಿಯಲ್ಲಿ ಕೊಚ್ಚಿಹೋಗುತ್ತಿದ್ದ

ಸಾವಿರಾರು ಮುಗ್ಧರ ಹೋಂಗನಸುಗಳ ರಾಶಿಯ ಕಂಡೆ

ವಾಸ್ತವದೆಡೆಗೆ ತಿರುದಾಗ ನೆನಪಾಯ್ತು

ಇದು ದೇಶದ ರಾಜಧಾನಿಯೆಂದು.

ಇಲ್ಲಿ ದಿನವೂ ದಿಗಿಲುಗೊಳಿಸುವ ಹೊಸ

ಆರ್ಭಟಗಳು ಕೇಳಿಬರುತ್ತವೆಯಲ್ಲವೇ

ಆಶ್ವಾಸನೆಗಳ ಸುಳಿಯಲ್ಲಿ  ಸಿಲುಕಿ  ಬಳಲದವರು

ಇಲ್ಲಿ ಯಾರೂ  ಉಳಿದೇ ಇಲ್ಲವೇ??

ಚಂದಾ / ಸವಿತಾ ಇನಾಮದಾರ್