Followers

Saturday, 27 July 2013

ನಿರೀಕ್ಷೆ…





ಮಂದಹಾಸ ಮೊಗದಲ್ಲಿ
ಹೊಂಗನಸು ಕಂಗಳಲ್ಲಿ
ಕಿರುನಗೆಯ ಬೀರುತ 
ನಿನ್ನಾಗಮನಕ್ಕಾಗಿ ಕಾದಿರುವೆ ನಲ್ಲಾ
ಇನ್ನಾದರೂ ನೀ ಬಾರೆಯಾ??

ನಿನ್ನ ನಿರೀಕ್ಷೆಯಲ್ಲೇ ನಾ ಕಳೆದ
ಆ ಸಮಯದ ಲೆಕ್ಕ ಕೊಡಲು
ನನ್ನ ರಮಿಸಿ ಮತ್ತೆ ನಗಿಸಲು ನಲ್ಲಾ
ಇನ್ನಾದರೂ ನೀ ಬಾರೆಯಾ?? 


ಚಂದಾ / ಸವಿತಾ ಇನಾಮದಾರ್.
 

Wednesday, 3 July 2013

ಮಣ್ಣಿನ ಘಮಲು..ಪ್ರೀತಿಯ ಹೊನಲು..




 ಹಳ್ಳಿಯಿಂದ  ದಿಲ್ಲಿಗೆ  ಬಂದರೂ
ತಾಯ ಮಡಿಲನು ಹ್ಯಾಗೆ ಮರೆಯಲಿ ??
ಅಲ್ಲಿನ ಮಣ್ಣಿನ ಮಧುರ ಘಮಲಿಗೆ
ಇಲ್ಲಿನ ಮಾಲಿನ್ಯವ  ಹ್ಯಾಗೆ  ಹೋಲಿಸಲಿ??
ಹಚ್ಚ ಹಸಿರು ಎಲೆಗಳಲಿ ಕಂಡೆ ನನ್ನ ಬಾಲ್ಯವ
ಹಣದ ಹೊಳೆ ಹರಿಸಿದರೂ ಕಟ್ಟೆನದರ ಮೌಲ್ಯವ
ಕೈ ಬೀಸಿ ಕರೆಯುತಿಹವು ಹಣ್ಣು – ಹೂವು, ಕಾಯಿ
ಕಾಯುತ್ತಾ ನಿಂತಿಹಳು ನನ್ನ ಪ್ರೇಮಮಯಿ ತಾಯಿ.
ಅವಸರದಿ ಅಪ್ಪಾಜಿ ಓಡೋಡಿ ಬರುವರು
ಮಗಳ ಮೊಗವ ನೋಡಿದೆಡೆ ಬರಸೆಳೆದು ಅಪ್ಪುವರು.
ತಂದೆ- ತಾಯಂದಿರ ಈ ಸುಮಧುರ ಬಾಧವ್ಯ
ಕೊನೆಯವರೆಗೆ ಇರುವುದು ಚಿರ ನೂತನ – ಚಿರ ನವ್ಯ.
ಚಂದಾ / ಸವಿತಾ ಇನಾಮದಾರ್.

Thursday, 27 June 2013

ಗಂಡನ ಗೋಳ್ಯಾಟ…



ಏ  ನನ್ನ ಪ್ರೀತಿಯ ಪಮ್ಮಿ…  
 ನನ್ನ  ಮಕ್ಕಳ ಮೆಚ್ಚಿನ  
ಗುಂಡು ಗುಂಡಗಿನ ಮಮ್ಮೀ..
ಇನ್ನಾರ ಮಾಡ ಸ್ವಲ್ಪ ನೀ
ತಿನಸೂದು - ತಿನ್ನೂದು ಕಮ್ಮಿ..
ಇಲ್ಲss ..ನೀ ಯಾರಿಗೂ ಇಲ್ಲಾ ಕಮ್ಮಿ,
ಆದ್ರ ನಿನ್ನss  ನೋಡಿ ನಾಚಲಿಕ್ಕೆ ಹತ್ತ್ಯಾವಲ್ಲ
ನಮ್ಮ ಧಾರವಾಡದ ಎಮ್ಮಿ..
ಏ ಪಮ್ಮೀ…ನಿಂದ್ರ..ನಿಂದ್ರು..
ಸ್ವಲ್ಪ ನನ್ನ ಮಾತು  ಕೇಳಿಲ್ಲೆ..
ಛೇ..ಛೇ.. ಬ್ಯಾಡ … ಬ್ಯಾಡಾ ರಾಣೀ..
ನಾ ಹೀಂಗಂತೀನಿ ಅಂತ
ಮಾರೀ ಸೊಟ್ಟ ಮಾಡ ಬ್ಯಾಡಾ
ಮತ್ತ ಜಿಮ್ಮಿಗೂ  ನೀ ಸೇರಕೋ ಬ್ಯಾಡಾ
ಅಲ್ಲಿಗೆ ಹೋಗಿ  ಎಷ್ಟ ಒದ್ದಾಡಿದ್ರೂನೂ ,
ಬೇಕಾದಷ್ಟು ರೊಕ್ಕಾ ಸುರುದ್ರೂನೂ ,
ನೀ ಆಗಂಗೇ ಇಲ್ಲಾ ಬಿಡು ‘ ಕಮ್ಮಿ.. ‘
ಆದ್ರೂ ಆದ್ರೂ..  ನೀನssss..  ನನ್ನ..
 ಪ್ರೀತಿಯ ಡುಮ್ಮ ಡುಮ್ಮಗಿನ .. ಪಮ್ಮಿ..
ನನ್ನ ಮುದ್ದಿನ ಮಕ್ಕಳ  ಪ್ರೀತಿಯ ಮಮ್ಮೀ…

ಚಂದಾ / ಸವಿತಾ ಇನಾಮದಾರ್.

Thursday, 20 June 2013

ಛೇ..ಛೇ...ಏನಿದು ವರುಣಾ…



ಛೇ..ಛೇ...ಏನಿದು ವರುಣಾ
ಮೊದಲು ಮುತ್ತಿನ ಮಳೆಗೆರೆದೆ
ಪ್ರೀತಿಯ ಉತ್ತುಂಗಕ್ಕೇರಿಸಿ  ಇಂದು 
ನೀನ್ಯಾಕೆ ಆ ಮತ್ತಿನಲಿ ಮುತ್ತೂ ಕಾಣದಂತೆ
ಎಲ್ಲವನು ಕೊಚ್ಚಿಕೊಂಡು ಹೋದೆ??? 

ಎಷ್ಟು ಹುಡುಕಿದರೂ ಸಿಗುತ್ತಿಲ್ಲವಲ್ಲಾ
ಆ ನನ್ನ ಪುಟ್ಟು ಅರಮನೆ..
ಗುರುತು ಸಿಗದಷ್ಟು ಬದಲಾಯಿಸಿ ಬಿಟ್ಟೆ
ನಿಲ್ಲಿಸು ಹರಿಯುವುದ ಒಂದೇ ಸವನೆ.

ಇದು ನಿನ್ನ ಸೇರುವ ಭುವಿಯ 
ಹಂಬಲ ತೀರಿಸುವ ಪರಿ ಏನು??
ಒಡಲ ಬಿರಿದು, ಎಲ್ಲೆಡೆಗೂ ಹರಿದು
ಈಗ ಸುಮ್ಮನೆ ನೋಡುತ್ತಿರುವೆ ಏನು?? 

ಹೇ ವರುಣ...ಇನ್ನು ಈ ಇಳೆ ತಾಳಲಾರಳು ನಿನ್ನ ಪ್ರಕೋಪ .
ತತ್ತರಿಸಿ ,ದಿಕ್ಕುಗಾಣದೆ ಅಲೆಯುತಿಹರು
ಕೇಳಲಾರೆಯಾ ಅವರೆಲ್ಲರ ಪ್ರಲಾಪ??? 

ಚಂದಾ / ಸವಿತಾ ಇನಾಮದಾರ್.

Friday, 31 May 2013

ಬಿಳಿಯುಡಿಗೆಯ ಒಡತಿ…




ವ್ಹಾರೆ  ಬಿಳಿಯುಡಿಗೆಯ ಒಡತಿ
ಎಷ್ಟು ಬೇಗ ನೀನಾದೆ ನನ್ನಿನಿಯನ ಗೆಳತಿ ??
ಆತನ ಮನದಲ್ಲೂ ನೀನೇ
ಆತನ ಬಾಯಲ್ಲೂ ನೀನೇ !!

ನೀ ಬರುವಾಗ ಹರಡುವೆ ಆ ನಿನ್ನ ಪರಿಮಳ
ಯಾರ ಮುಂದೆ ಹೇಳಲಿ ಎನ್ನ ಮನದ ತಳಮಳ ??
ಬೆಳ್ಳಿಯ ಅರಮನೆಯಲ್ಲಿ ನೀ ವಾಸ ಮಾಡುವೆ,
ಆದರೂ ನೀ ಯಾಕೆ ನಿರಾಭರಣ ಕಾಣುವೆ???

ಮೀಯುತ್ತಿದ್ದ ಇನಿಯ ನನ್ನ ಮುಗ್ಧ ನಗೆಯ ಹೊಳೆಯಲ್ಲಿ
ಮುಳುಗಿ ಹೋಗಿರುವನೀಗ ನಿನ್ನ ಬಿಳಿಯ ಹೊಗೆಯಲ್ಲಿ.
ಸುಖ –ದುಃಖದಲ್ಲಿ ಮೊದಲು ಭಾಗಿಯಾಗುತ್ತಿದ್ದೆ ನಾನು
ನನಕೂ ಮುಂಚೆ ಇರುವೆಯೀಗ ಅವನ ಬಳಿಯಲ್ಲಿ ನೀನು .

ಕೆಲವೇ ದಿನಗಳವರೆಗೆ ನಡೆಯುವುದು ನಿಮ್ಮೀ ಚೆಲ್ಲಾಟ
ಡಾಕ್ಟರನ್ನು ಕಾಣ ಬೇಕಾದಾಗ ಆಗುವುದು ನೋಡು ಪರದಾಟ.
ಎಷ್ಟೆಷ್ಟೋ ವಿಧಗಳಿಂದ ಬಿನ್ನಹಿಸಿದ್ದೆ ನಿನ್ನ ಬಿಡಿರೆಂದು
ಪಶ್ಚಾತ್ತಾಪ ಪಡಹತ್ತಿಹರೀಗ ನಾನೇಕೆ ಆದೆ ಹೀಗಿದರ ದಾಸನೆಂದು????

ಚಂದಾ / ಸವಿತಾ ಇನಾಮದಾರ್.

Friday, 24 May 2013

ವಿಪರ್ಯಾಸ


ಖಾಲಿಯಾದ ಬಿಸಿಲೇರಿ ಬಾಟಲಿಯ ನೋಡುತ್ತಾ
ಬೆವರಿನಿಂದ ಒದ್ದೆಯಾದ ಕರವಸ್ತ್ರವ ಹಿಂಡುತ್ತಾ
ರೊಚ್ಚಿಗೆದ್ದ ಸೂರ್ಯನ ತಾಪವನ್ನು ಸಹಿಸುತ್ತಾ 

ಹುಡುಕುತ್ತಾ ಹೊರಟಿರುವೆ  ಒಂದು ಹನಿ ನೀರಿಗಾಗಿ.

ಚಂದಾ / ಸವಿತಾ ಇನಾಮದಾರ್.